Во октомври 2019 година, претставниците на шест театри од регионот потпишаа Протокол за соработка и ја формираа Регионалната унија на театри – РУТА.

Унијата ја сочинуваат: Местно гледалишче љубљанско, Љубљана – Словенија; Београдско драмско позориште, Белград – Србија; Камерни театар 55, Сараево – Босна и Херцеговина; Казалиште Улисис, Загреб – Хрватска; Центар за култура, Тиват – Црна Гора и Драмски театар, Скопје – Македонија.

„Со намера да се институционализира идејата за соработка меѓу сродните театри од регионот со цел да ги презентираат меѓусебните достигнувања преку различни форми на соработка, презентираjќи актуелни теми и идеи од областа на уметноста од регионот, како и преку заедничка работа да се имплементираат различни значења и достигнувања“, пишува во преамбулата на Протоколот.

Фестивалот РУТА е единствен по својот модел, чија основа е ревијалната програма – секој театар изведува претстава по сопствен избор. Во текот на годината, сите театри ја преземаат улогата на домаќини на нивните сцени.

РУТА Скопје традиционално се одржува последната недела во октомври.

Од 2026 година, на РУТА Скопје публиката ќе има прилика во рамките на новата програма МоноРУТА да ги погледне најинтересните монодрами од регионот, во изведба на гостувачките театри. Сите претстави од МоноРУТА се одржуваат на Академската сцена при Факултетот за драмски уметности – Скопје со почеток во 17:00 часот, а цената на билетот за нив изнесува 300 денари и може да се купи на билетарницата на Драмски театар и преку нашата веб-страница.